|
|
RUXIDOIRO
L'Asociación Cultural el Rapigueiro l.leva duos años trabayando n'esta actividá cultural ya festiva. RUXIDOIRO significa ruxíu grande, fuerte, estridente. Ninguna pal.labra meyor qu'esta pa pone-y nome a un eventu que tien por oxetivu principal esparcer bien alto la cultura ya la tradición del pueblu allandés ya asturianu.
Conferencias, conciertos, recuperación de vieyas costumes, presentaciones de l.libros, xuntanzas grastronómicas, etc. son dalgunos de los actos que se desarrollan nesta xornada.
[Acceso a blog con más información] 
1º RUXIDOIRO Ayandés (2 de setiembre de 2005):
- Conferencia a cargu de Xosé Antón "Ambás": "La tradición musical no conceyu d'Ayande", cona intervención musical de Diego Pangua (xiblata) ya Dolgu Fernández (vigulín).
- Pasacais de la Banda de gaitas El Rapigueiro y bandinas tradicionales polos chigres de la vil.la..
- Conciertu homenaxe a la bandina ayandesa Aires del Palo no Café Centro, que vei contar cona participación de la Bandina los Llanzones, la Bandina'l Tombo, DRD, El Rapigueiro ya una l.larga llista de músicos invitaos. El conciertu vei grabase pola compañía discográfica Fonoastur a través d'un estudiu móvil.
· 2º RUXIDOIRO Ayandés (30 de setiembre de 2006):
- Conferencia no salón d'actos del ayuntamientu de David Martín ya Jorge Bermúdez: "Las burras Asturconas del Occidente d'Asturias".
- Presentación de la Xunta pola Defensa de la L.lingua Asturiana n'Ayande.
- Pasacais polos chigres de la vil.la de la Banda de Gaitas el Rapigueiro y bandinas tradicionales.
- Conciertu na nueva sede social del Rapigueiro (El Klandestino) a cargu del grupu local NOS acompañaos a las gaitas ya a la voz por dalgunos miembros de la banda gaitas. ¡Ya armóuse folixa hasta que canto'l gochu!!
 |
 |
 |
|
CÉLTICA VI:
AIRES DEL PALO
La voz viva del pueblu, la voz que vien del fondu de la tierra, la que percuerre la memoria de las xeneraciones como se fora l'álitu vivu de la esperanza. Un cantar, un ramu, una danza, un beille, una vaqueirada, un son, una xácara, son llugares aú habita una suerte de sabiduría que tien que ver cola harmonía toa del mundu. Porque esa sabiduría de sabese heriedes d'aquellos que deixanon la sou voz, la sou presencia nunas melodías que cellebranon la vida, que choranon la muerte, qu'alcordanon a los que yá nun tan, a los que miran la llínia del cielu ya ven ensel los verdes praos onde la romería -la postrer romería, la única que se vivíu, la única que se suañóu-vei diliénduse na distancia. Nesa distancia amarguxada de quien se sabe lluenxe de los sous, ya siente los sones retinxendo na memoria como una ferida qu'enxamás encarna.
Esa romería que se vei cuntando cola gramática de l'ausencia, que se vei conxugando colos vierbos de la señaldá: aquella moza qu'apurrióu gallaspera la manu na danza, que llevaba na mirada toula lluz primeira de la mañana, ya la sou risa yera como l'ecu atoupadizu d'una casa aú amiya la paz del valle. Esa romería onde una tonada -como se d'una profecía se tratara-fala del dolor de la partida, de la crueldá del mundu. Esa romería que son toulas romerías xuntas, esas que se viven como se enxamás foran a terminar, las qu'echan al aire la fiesta, la vida, la verdá. Asina outros serán a llevantar en chigre unos vasos polos que yá nun tán, ya pedirán que sone la música, que volva la fiesta: que volva a sonar la música cuando "Aires del Palo" emprime a llamar al beille nun llugar que nesi intre ía'l centru l'universu. Ayande, seique.
Por ellos, por nós, polos qu'enantes de nós quixenon ver, tamién, la primer lluz de l'alborada na sorrisa inmensa d'una neña.
NACIU LLOPE
|
|
 |
|
 |
|
|
|
|
CÉLTICA VII
MARIO, EL D'AIRES DEL PALO
Apurre la muerte esi sentimientu tráxicu de la vida -ya nun se trata d'un oximoron--, qu'en palabras de don Miguel d'Unamuno, ía un determín fatal que cincela la consciencia, xustifica la memoria. Porque siempres vien la muerte a irguir, precisamente nel fondu de la consciencia, esa fatalidá que ía sabese un vientu efímeru, feble, débil, na xeografía del mundu, na alcordanza de los homes. La memoria, --que de dalguna miente trabaya cola materia que vien directamente de la realidá, pero d'una realidá sabiamente peñerada pol tiempu-volve a debuxar el perfil noble ya arrogante de Mario López Mesa, esi músicu que toucaba'l redoblante na bandina ayandesa d'Aires del Palo, siempres con una sorrisa de retranca na bouca. Mil ya milenta nueches nas qu'abicóu'l riscar del alba, mentanto'l goce del baille, la liturxa de la dancia, executábanse cola precisión d'un ritu. Mario, silenciosu ya candial, enxunto a los sous compañeiros Xelu --el primeiru n'albandonar esti mundu--, Manolo, Pepe'l Chingao ya Laude percorrienon tierras ayandesas ya de la contornada llamando a folixa; ya na capital del conceyu, La Puela, fonon mentanto venti años l'alma de los filandones modernos que xentes vinientes de toul país armanon a comuña con naturales ya foriatos. Una ya bonas, trátase de sones, imáxenes, cantares, beilles que van configurando una xeografía sentimental na que xentes como Mario -Mario, el d'Aires del Palo-son el filu que val de reconocencia nuna manera de tar ya ver el mundu que surde del fondu esactu d'esta tierra. Con Mario, con Xelu, con caún d'ente ellos veise irremediablemente un cachu más d'una raza de peisanos ya peisanas que fonon a vivir cola dignidá ya l'argullu de quien ía heriede d'aquellos qu'iguanon ya defendenon la casa de sou. Ya'l final, cuando acaba la fiesta, calla la música, ya allégase l'alborada, ser quien a despidíse cola mirada llimpia, pousada nel aire yá definitivamente. Como feixo Mario, una nueche de noviembre de 2005, nel Café Centro de La Puela, que tamién yera'l centru del mundu.
NACIU LLOPE
|
|
|
|
|
|
 |
|
 |
|
|
El Rapigueiro ©2007
|
|
|
|
HISTORIA
