La identidá faise con filos pequeños y, ente nós, con filos d`ausencia. Pero pal güeyu antropolóxicu, ¿qué será más bárbaro o celtorromano?: les guerres astures nes llendes del Imperiu, les guerres de villistes y renovadores nes fronteres del neolliberalismu, los afoguinos de la izquierda por baxar al mercáu o los arqueólogos que faen arqueoloxía imperial al serviciu de la patria de Nerón. Anguaño quedes plasmando: Amaga rexurdir embaxo la tierra la identidá pelayina. L`escudón, grandón, y la espada, pequeñina.

La mina ta nel inconsciente colectivu del nuesu pueblu. Mira ún pal Chao Samartín, y callestra nesos fosos atiyeraos en piedra con venes de fierro`l "Viaxe ao país dos ananos" de Celso Emilio Ferreiro. Atalanta entós por qué pa muncha xente Asturies ye namás un pozu. Nun ye que la sociedá desbaraxuste la visión. Ye que ta plasmando. Como`l Bardu, cuando vio la espadina d`antenes de Taramunde rellumando nel llar del Ferreiro. "Ye la primer navaya de Taramunde", dicía Ángel Villa, arqueólogu de los de verdá: "En dos mil años el castru nun movió l`allugamientu, nin los ferreiros dexaron de facer navayes". "¡Home, claro…!", dixo Mariquina. "Ye la espadina del Plasmu de Taramunde, que ye de la xente pequena… El Rapigueiru nun se rinde. Resiste, como la bandina ayandesa".